ઓસ્કાર એવોર્ડ વિજેતા સંગીતકાર એ. આર. રહેમાન અને પત્ની સાયરા 29 વર્ષ બાદ તલાક લેશે

તણાવ અને મુશ્કેલ પરિસ્થિતિથી પીડાને કારણે ડિવોર્સનો નિર્ણય લીધાની સાયરાની જાહેરાત

જાણીતા સંગીતકાર અને ઓસ્કાર વિજેતા ગાયક એઆર રહેમાન અને તેમની પત્ની સાયરાએ છૂટાછેડાની જાહેરાત કરી છે. લગ્નના 29 વર્ષ બાદ બંને છૂટાછેડા લેવા જઈ રહ્યા છે.

આ કપલના લગ્નને 29 વર્ષ થયા છે. હવે તેના વકીલે સત્તાવાર રીતે છૂટાછેડાની પુષ્ટિ કરી છે. આનાથી ચાહકોને પણ ઊંડો આઘાત લાગ્યો છે. નિવેદનમાં કહેવામાં આવ્યું છે કે, બંને ભાવનાત્મક તણાવને કારણે આ નિર્ણય લઈ રહ્યા છે.

વકીલે કહ્યું હતુ કે, લગ્નના ઘણા વર્ષો પછી, શ્રીમતી સાયરાએ તેમના પતિ એ.આર.રહેમાનથી અલગ થવાનો મુશ્કેલ નિર્ણય લીધો છે. આ નિર્ણય તેમના સંબંધોમાં ઘણા ભાવનાત્મક તણાવ પછી આવ્યો છે.

એકબીજા પ્રત્યેનો ગાઢ પ્રેમ હોવા છતાં, આ દંપતીએ શોધી કાઢ્યું છે કે તણાવ અને મુશ્કેલીઓએ તેમની વચ્ચે અંતર ઉભું કર્યું છે, જે આ સમયે બંને પક્ષો દૂર કરી શક્યા નથી.સાયરાએ ભારપૂર્વક જણાવ્યું હતું કે, તેણે પીડા અને વેદનાને કારણે આ નિર્ણય લીધો છે. સાયરા આ પડકારજનક સમયમાં લોકો પાસેથી ગોપનીયતા અને સમજણની વિનંતી કરે છે કારણ કે તે તેના જીવનના આ મુશ્કેલ સમયમાંથી પસાર થઈ રહી છે. એઆર રહેમાન અને સાયરા બાનુના લગ્ન 1995માં થયા હતા. દંપતીને ત્રણ બાળકો છે, ખતીજા, રહીમા અને અમીન એઆર રહેમાનના ચાહકોને આ વાત પર વિશ્વાસ કરવો થોડો મુશ્કેલ થઈ રહ્યો  છે.